இரவின் இருட்டில் நிகழ்ந்த முஹம்மது நபியின் விண்வெளிப் பயணம் - மிஃராஜ்!

 

முதல் மனைவி கதீஜா மரணித்ததன் பின்னர் தனது முதல் காதலி பகிதா பின்த் அபூதாலிப் (உம்மு ஹனியா) உடைய வீட்டில் இராத்தங்கிவிட்டு, காலையில் எழும்பி வந்து தான் ஒரே இரவில் விண்வெளிக்குப் போய்வந்ததாக முஹம்மது நபி கூறினார். மிஃராஜ் போனதாக சொல்லப்படும் இரவில் முஹம்மது நபி யாருடைய வீட்டில் இராத்தங்கியிருந்தார் என்பதை மெளலவிகள் முஸ்லிம்களுக்கு ஒருபோதுமே சொல்லித்தர மாட்டார்கள், அதனை வசதியாக மறைத்து விடுவார்கள். யாரவது ஒரு மெளலவி அடுத்த தடவை மிஃராஜ் குறித்து பயான் செய்யும் பொழுது மறக்காமல் அவரிடம் கேளுங்கள், முஹம்மது நபி யாருடைய விட்டில் படுத்திருக்கும் பொழுது மிஃராஜ் நடைபெற்றது என்று.


பெண்ணுடைய முகத்தைக் கொண்ட, அரபு மொழியில் பேசக் கூடிய, கழுதை போன்ற உடலைக் கொண்ட, பறவை போல சிறகுகள் கொண்ட புராக் எனும் ஒரு உயிரினத்தின் முதுகில் ஏறி உட்கார்ந்து விண்வெளிக்குப் போனாராம் முஹம்மது நபி. அதிலே ஏறிப் பறந்து பறந்து மேலே போனதும் முதலாவது வானம் வந்ததாம், அதற்குக் கதவும், கதவிற்குக் காவல்காரர்களும் இருந்தார்களாம், கதவைத் தட்டி, காவல் காரர்களின் கேள்விக்கு சரியாக பதில் சொன்ன பின்னர்தான் உள்ளே நுழைவதற்கு அனுமதிக் கிடைத்ததாம், இப்படியாக ஏழு வானங்களிலும் கதவுகளைத் தட்டி மேலே சென்று முஸ்லிம்கள் ஐந்து நேரம் தொழும் தொழுகையை அல்லாஹ்விடம் இருந்து பெற்று வந்தாராம்.

 

வானம் என்றால் என்ன, வானத்திற்கே கதவா, கதவுக்கு காவற்காரர்களா, ஏழு வானங்கள் எப்படி இருக்க முடியும், புராக்கின் முதுகிலே ஏறி மேலே போகின்றவருக்கு சுவாசிக்க ஒட்சிசன் எப்படிக் கிடைக்கும் போன்ற சாதாரண கேள்விகளையும், வானத்திற்கு கதவுகள் இருக்கும், அவற்றிற்கு காவல் காரர்கள் இருக்கின்றார்கள், அங்கே போகின்றவர் கதவைத் தட்டி "வீட்ல யாரு" என்று கேட்டு, அவர்களின் கேள்விகளுக்கு பதில் சொன்ன பின்னர்தான் கதவைத் திறந்து விடுவார்கள், வானத்தின் கதவிற்கு வெளியில் நிற்பது யார் என்று பார்க்கும் CCTV போன்ற தொழில்நுட்பங்கள் எல்லாம் அல்லாஹ்விற்குத் தெரியாதாம் போன்ற இஸ்லாமிய நகைச்சுவைகளையும் ஒரு பக்கம் வைத்துவிட்டு புராக்கில் ஏறிப் போன பயணம் பற்றி மட்டுமே சுருக்கமான வகையில் சிந்தித்துப் பார்ப்போம்.

சாதரணமாக விமானம் ஏறி தொழிலுக்காக, கல்விக்காக, சுற்றுலாவுக்காக, வியாபாரத்திற்காக என்று வெளிநாட்டுக்குப் போகின்றவர்களே நண்பர்கள், அயலவர்கள், தெரிந்தவர்களிடம் சொல்லிவிட்டு போகும் பொழுது, யாருமே செய்திருக்காத ஒன்றை செய்ததாக சொல்லிக்கொண்ட முஹம்மது நபி மட்டும் ஏன் இரவின் இருட்டில் இரகசியமாக இராத்திருடர்கள் தொழிலுக்கு போவது போல போய்வர வேண்டும்? மக்காவாசிகள் அனைவரையும் காலை நேரத்தில் ஓரிடத்திற்கு அழைத்து, அவர்களின் முன்னாலேயே அந்த புராக்கில் ஏறி விண்வெளிக்கு பறந்து சென்று இருக்கலாமே? ஏன் செய்யவில்லை? எதற்காக யாருக்கும் தெரியாமல் இருட்டில் போய்விட்டு இருட்டு வெளிர்ப்பதற்கு முன்னரே திரும்பியதாக கதையளக்க வேண்டும்? முஹம்மது நபி மிஃராஜ் சென்றது உண்மை என்றால் அதனை பகலின் வெளிச்சத்தில், மக்களின் முன்னிலையில் நேர்மையாக சென்று இருந்தால் பலரும் பார்த்து இருப்பார்கள், கண்ணால் கண்ட சாட்சிகள் இருந்திருக்கும், தூரப் பிரதேசங்களில் உள்ளவர்களும் கூட கண்டு இருப்பார்கள், கண்டவர்களில் கணிசமான எண்ணிக்கையினர் இஸ்லாத்தையும் ஏற்றுக் கொண்டும் இருப்பார்கள். ஆனால் இவை எதுவுமே நடக்கவில்லை.

ஹிஜ்ரத் முதல் ஜிஹாத் வரை மற்ற மனிதர்களின் உதவி தேவைப்படும் அனைத்தையுமே முஹம்மது நபி மற்றவர்களுக்கு முன்னாலேயே செய்து இருக்கின்றார். மக்காவில் இருந்து புராக்கில் அவரால் மதீனாவிற்குப் போக முடியவில்லை, தாயிப்பில் கல்லடி கொடுத்த பொழுது அதிலிருந்து தப்ப முடியவில்லை, உஹதில் காலித் இப்னு வலீதின் படைகள் பல்லு உடைய அடி கொடுத்த பொழுது ஜிப்ரயீல் வந்து அவரைத் தூக்கவும் இல்லை, புராக் வந்து காப்பாற்றவும் இல்லை, அதே போல எந்த ஒரு யுத்தத்தையும், கொள்ளையையும் தனியாக மலக்குகளுடன் சென்றோ, புராக்கில் சென்றோ அவரால் மேற்கொள்ள முடியவில்லை, எல்லாவற்றிற்கும் சஹாபாக்களின் துணை, பணம், குருதி, உயிர், உடைமைகள் என்று அனைத்துமே அவருக்கு தேவைப்பட்டன, ஆனால் விண்வெளிக்குப் போனேன், ஜிப்ரயீலை சந்தித்தேன் என்று கதையளக்கும் பொழுது மட்டும் அவை எல்லாமே அவர் தனியாக இருக்கும் பொழுது நிகழ்ந்து இருக்கின்றனவாம். முன்னாள் (முதல்) காதலியில் வீட்டில் போய் படுக்க வேண்டியது, காலையில் எழும்பி ‘விண்வெளிக்குப் போனேன்’ என்று கதையளக்க வேண்டியது, இதையெல்லாம் இன்னுமும் நம்பிக்கொண்டு இருக்கின்றது ஒரு பெரும் கூட்டம், ஆனாலும் அப் பெரும் கூட்டத்தில் ஒரு தளம்பல், ஒவ்வொருவராக கழண்டு பகிரங்கமாகவும், இரகசியமாகவும் சிந்திக்கக் கூடிய மக்கள் வெளியேறிக்கொண்டு இருக்கின்றார்கள், தொடர்ந்தும் வெளியேறுவார்கள், அடுத்து வெளியேறப் போவது நீங்களாகக் கூட இருக்கலாம்.

முஸ்லிம்களே, ஒவ்வொரு முறையும் தொழுகைக்காக தக்பீர் கட்டி நிற்கும் பொழுதும், சுஜுதிற்காக தலையைக் கொண்டுபோய் தரையில் முட்டும் பொழுதும் இவற்றை கட்டாயம் சிந்தனை செய்யுங்கள். நீங்கள் தொழும் பொழுது இந்த சிந்தனைகள் நிச்சயம் உங்களுக்குள் வரும், கஷ்டப்பட்டு அவற்றைத் தடுக்காமல் இயல்பாக சிந்தியுங்கள். சிந்திக்கக் கூடிய மக்களுக்கு இவற்றில் நிச்சயமாக படிப்பினைகள் உள்ளன.


றிஷ்வின் இஸ்மத்
03.07.2021